1. deild menn: FC Suðuroy-B71 2-3

Details

Published: Mikudagin, 31 mars 2021 16:04

Langa ferðin gav úrslit

Dystir í Suðuroy eru sjáldan beint fram eftir rommum. Serliga tá man kemur av Sandoynni og skal norð og síðani suður, so eru nógv ting at taka atlit til. Tá dysturin harafturat liggur leygardag, so er uppaftur størri logistisk ting at taka atlit til. Smyril siglur tíðliga um morgunin, so mikið tíðliga at til ber ikki at koma norð sama morgun og náa næsta bát suður og tí mugu menn norð kvøldið fyri, gista og síðani ferðast suður kl. 07.00 leygarmorgunin.

Hettar eru tó premissurnar og suðuroyingar mugu ferðast líka nógv sum vit og sikkurt viðhvørt meira, so har er onki hjá okkum at grenja um. Ofta er tað eisini ein spurningur um man velur at síggja forðingar ella møguleikar við tílíkum túrum. Nakrir av stuttligastu og minnisverdu túrunum hjá sandoyingum hava verið í Suðuroy, ja kanska enntá heilt nógvir. Vikuskiftið hesuferð var eiheldur nakað undantak. Leikarar gistu saman umborð á Smyrli og ferðaðust suður, har teir fingu gott at eta í Vági og nutu gott av gestablídni frá bæði Garðslon og í savninum hjá Handlinum á Gørðunum, har vit styttu okkum stundirnar beint frammanundan, áðrenn vit løgdu leiðina vestur á Eiðið til dagsins dont.

Ístaðin fyri at stúra fyri øllum sum kundi ganga galið ella hvussu nógva ferðingin o.a. fór at ávirkað avrikið á degnum, so valdu vit at síggja hettar sum ein samansjóvandi túr fyri menninar. Onkuntíð hava vit tikið stig til onkrar samansjóvandi venjingarlegur áðrenn kappingarbyrjan, men hesuferð var tíverri ikki tíð og yvirskot at stíla fyri tílíkari. Av tí sama, so var ferðin til Suðuroyar ein fínur møguleiki at geva leikarunum møguleika fyri at koma at kenna hvønn annan betur og knýta vinarbond. Hesin parturin av fótbóltsspælinum er so ótrúliga týdningarmikil og meir enn so nakað, ið kann gera seg galdandi tá eitt lið vinnur á einum øðrum.

Væl upplagdir suðuroyingar

Tað er altíð ein vandi, tá man fer at vitja eitt lið, ið júst er komið upp úr lægri deild, at man undirmetir hvat hesir eru førir fyri. Tað kemur fyri at okkara gera seg skyldigar í at undirmeta og, hvat eisini rætt er, so verða vit straffaðir fyri tað. Viðhvørt sleppa vit við skrekkinum, men tá vit ikki gera tað, so svíðir tað sjálvsagt.

Hesuferð sá tað tíbetur ikki út sum um vit gjørdu okkum skyldigar í nakrari undirmetan. B71 leikararnir fóru miðvíst eftir einum úrslitið og royndu at stilla seg fyri hvørja einastu ferð suðuroyingar trýstu. Eftir 29 minuttir, so fáa vit eisini eitt uppiborið leiðslumál og tað er altíð málfarligi Aron Clementsen, ið smekkar bóltin í netið til 0-1. Tíverri lata vit eisini eitt mál hin vegin, bert 6 minuttir seinni, tá suðuroyingar loksins eydnast við trýsti teirra og javna til 1-1.

Tíbetur gongur tað bert ein lítil løta, so hevur B71 aftur lagt seg á odda. Clayton Soares vísir hví hann hevur verið so seigur í føroyskum fótbólti við einum reiðiligum "poacher's goal". Løtu frammanundan hevur maðurin verið í einari duel við suðuroyingar beint frammanfyri mál teirra og liggur tí eina løtu og eymkar seg. Spælið gongur víðari og B71 trýstir høgt uppi. Verjuleikarin, ið hevur bóltin í vinstru síðu, hevur eftir øllum at døma gloymt at brasilienski áloyparin er beint aftanfyri og spælir bóltin aftur til málverjan. Clayton benyttar sær av hesum og fær fatur á bóltinum, rundar hjálparsleysa málverjan og skýtir bóltin í netið til 1-2.

250 mál!

Eftir dystin funnu vit útav at júst hettar málið var samanlagt nr. 250 hjá Claytoni í føroyskum fótbólti. Lítilætni brassin hevur ongantíð verið ein sum hevur reypa um so at siga nakað sum helst, so tað má vera okkara uppgáva at gera tað fyri hann.

Clayton hevur leikt í Føroyum síðani 2002 og hevur í 18 kappingarár skotið 250 mál. Nógv hevur hann harafturat skotið í bestu deildini í føroyskum fótbólti, umframt at hann fyri ikki so nógvum árum síðani var toppskjútti í bestu deildini, tá hann leikti við ÍF.

Clayton verður 43 ár í november mánaði og spurningurin er hvussu leingi hann orkar at halda á fram at skjóta mál og luttaka á høgum støði, men eitt er sikkurt, og tað er at sandoyingar, umframt øll hini liðini sum hava notið gott av vandamikla áloyparanum, ynskja manninum hjartaliga tillukku við hesum frálíka avrikinum.

1 mál (higartil)

B71 fær eitt mál afturat í 68. minutti og hesu ferð leggur Clayton upp til seinasta mál okkara, tá hann lobbar bóltin uppum suðuroyarverjuna og nýggi amerikanski áloyparin Joel Vazquez spelar ímillum, fær fatur á bóltinum og smekkar hann framvið málverjanum til 1-3 og allarfyrsta mál hansara í føroyskum fótbólti.

Í 71. minutti er tíverri aftur galið og suðuroyingar minka um munin til 2-3, men meiri hendir ikki í dystinum og B71 vinnur dystin.

NSÍ á heimavølli skírishósdag

Næsta uppgáva er ein torfør uppgáva tá runavíksingar koma á vitjan skírishósdag. Nú er hinvegin ikki tíð at slaka, men at dríva á maskinuna. Vónandi eru leikararnir við at koma á lagið og mugu arbeiða hart fyri at halda eina góða gongd koyrandi.

Vónandi verður tað enn eitt gott úrslit at leggja afturat páskaferiuni.

Livst so spyrst.

Drívið á B71!